Gen 34 | WRS | STEP | Doa Yakoptatanamba di aevulvna Kenan pethara. Doa Dinava molva ganamba, ungevlim sehelm nongalkalm gavna ungund ungevlim.

Genesis 34

Ungundtendorini Yakopnamba Molm Kevrana Dinam.

1 Doa Yakoptatanamba di aevulvna Kenan pethara. Doa Dinava molva ganamba, ungevlim sehelm nongalkalm gavna ungund ungevlim. 2 Doa ganamba, tendorini nonglana, kevrana, wailina, os indkokla vrena, nihilva Sekem. Himba Hamorna ombol lohvna Hivtindirini, Hamorva nomba kuwul mendekli himba wulluhunvna. 3 Doa sisva himba Dinam mindnam undnahonam nengmanavna, vralm vevna, 4 hevna aralm omnana, yeoa di nisraho no ungevlirinina aralmoa, ka vratam.

5 Doa Yakopva hellenamba, momba doa indkokla vrei, doa himba mana vema velm vevna, wo owai, manara, ombolva tatam wonlovahmana vevna oklam, hevho avna. 6 Avnamba, Hamorva kembelliniva venamba, engpra, moam ishomnalm, himba Sekemna aral. Engpranamba, Yakopna ombolva ambvna. 7 Doara himba hillinamba, nonora ambvna, doa hemba sahokla vinvna, aembko lomotha vivna, pai, pina muskovmba doa kevrai, himba sahonam venei, wo honamba memba pim louwolm plothuni pim Israelnindm.

8 Doa Hamorva Yakopm nonglaphonamba, omnana, kana ombolva Sekemba yena molm mindnam nengmanav, vralm vev. Wo es hevpa vravavma? 9 Kava yei ihisholm evev tanamolnam, osm mongawulm pioa ambo wohlovahvra. Osva pimba vitava, si yunalm pimba wohaevulvav, yimba honahalmba almba vevrava, osoa wouta. Osva pimba si ongamba evrowolvra, yimba kainda, eva kava yeinda, wo yenamba deuvpa lohvra, eva wohva esvema. 11 Doa Sekem ishunna Yakopm eva towandalm, yimba nomba utava hona yena ungevlirini indava, kava wohva yemba si osva dembrahunvav. 12 Yimba mana vemava wohmba ningtava mindnamba, dinahonamba osva kava nis ambo dembrahunvav yemba. Manam yimba owai vivav, kamoa plahongas viu, kava ambo wohvengas vevav.

13 Doa Yakopna ombolva hillinamba, unna, lehra, heva os boasna yeoa pevna nihtovm kuku, manara, osva owai vitava, kava lou vivav muskovmba pelaholmba. Dasalm unna muskovolnilm. Boasna yeoa nihtovm kuku, wo os pho, men kav, doa osva yemba kava kavna muskovmba pelahunvav. 16 Wo si yunalm pimba mongawulm woheuvmona vevav mongawatindilm, wo ongases vewulvra. 17 Yimba owai vitava, osva kava wohwaiangavav si.

18 Dasalm umnivna, doa Hamori Sekemi ehellenamba ohona, lehra. 19 Doa Sekemba lelnam phonamba, doa osangas vena, manara, himba mindnam nengmanavna Dinam. Hev mendekli nihilm wulluhunna hevtindinam. 20 Doa Hamoriva Sekemiva henga kembellam enganamba, kuksaruvra di epho, mundilm di uhunna, 21 Yakoptindiva pimba musk vinvmoa, pioa nombolvhoawol velvohra, piv mongawulm aevulla. Himba angalmba vevrava mongnahalmba, manam pimba sandhivav, pethava pinamba vavawonam luhunv. Si pimba ongases wonvivra hemongova. 22 Heva os pimba keknam doa ishuni, yeoa nihtovoa kuku, wo os pho men kav. 23 Pioa os velvohra, wo mana vemamba henamba wohva tatamba nomba pim velohunvra. 24 Doa indkumbi noi mundil una, lehra, wo indkumbi hevnamba nihtovmba kokoihanga vivna osangas.

25 Doa simba samblamong vivnamba, mendah nihsesoa vinvna, wo Yakopna ombol sambla Simeoni Levii, himba no kembellam esihohona ovlanahonam ambo wowonam. Kembelnindva nungeilnamoa, himba una, ambo eprav. Doa ephonamba, tendomba helvakomo evepia hevna muskovolnilm. 26 Doa Hamorim Sekemim eva helvakomo evena, wo muskovolm deuvrini Sekemnamini os henga waieprana. 27 Doa sisva Yakopnamba monglamba ombolva anganamba, wohva yunalm dumbpia muskovolnawusra. Sipsipm, memem, sapim, donkim, inne osorinim, eva ungevlitundism, manimani deuvmerinim, doa os wulprona.

30 Doa Yakopva Simeonim Leviim unna, honamba mani beswonamma, memba yimba eveiva, kamba si osva kin plothunvav. Manara indkola ungundva si kamba osva sahonam ningminivav Kenannind, Peresnind, indakonda pethanindva. Pimba mani indkumbima, himba hevm moakot evewollava, pimba si helvakomo vivav, katindiva si wohvitivhoavav. 31 Wo he ohomnana, hona tendoriniva kana muskovolmba kevrinnamba, maim oi ungevlirini monarini, wo noinda kava ohovovna.